|
 ນະຄອນຫລວງວຽງຈັນ, ວັນທີ 9 ມິຖຸນາ 2010--ບໍລິສັດສີມັງລາວຮ່ວມກັບໂຮງງານສີມັງ ວັງວຽງ ເຊັນຫນັງສືສະເຫນີການຈັດຕັ້ງປະຕິບັດກິດຈະກຳ ໂຄງການກົນໄກການພັດທະນາທີ່ ສະອາດ ແລະ ໂຄງການພະລັງງານທີ່ມີປະສິດຕິຜົນ ນຳ ນັກລົງທຶນເຢຍລະມັນກໍ່ຄື ບໍລິສັດ Climate Control Strategies GmbH ເພື່ອຮ່ວມກັນລິເລີ້ມໂຄງການການລຸດຜ່ອນໂລກຮ້ອນ ແລະ ຮັກສາສະພາບແວດລ້ອມ.
ໂຄງການດັ່ງກ່າວມີຈຸດປະສົງລຸດຜ່ອນຜະລັງງານເຊື້ອເພີງ ແລະ ຄ່າໃຊ້ຈ່າຍໃນການຜະລິດ ສີມັງ ແລະ ໃນເວລາດຽວກັນ ກໍ່ເປັນການຮັກສາສະພາບແວດລ້ອມ ໂດຍການນຳ ໃຊ້ເຕັກໂນ ໂລຊີ ທີ່ທັນສະໄຫມຈາກປະເທດ ເຢຍລະມັນ ແລະ ເດັນມາກ.
ສະພາການຄ້າ ແລະ ອຸດສາຫະກຳແຫ່ງຊາດລາວ ໄດ້ເປັນສ່ວນຫນຶ່ງ ນຳເອົາໂຄງການດັ່ງ ກ່າວເຂົ້າສູ່ພາກທຸລະກິດ ຍ້ອນຄຳນຶງເຫັນ ຄວາມສຳຄັນຂອງສະພາບແວດລ້ອມ ແລະ ບັນຫາໂລກຮ້ອນ. “ສຄອ ກໍ່ຈະສືບຕໍ່ດຶງເອົາໂຄງການໄປຜັນຂະຫຍາຍ ໃນໂຮງຈັກ ໂຮງງານ ອື່ນໆ ທີ່ນຳໃຊ້ພະລັງງານຫລາຍມີສ່ວນເຮັດໃຫ້ໂລກຮ້ອນ,” ກ່າວໂດຍ ທ່ານ ວັນທອງ ສິດທິກຸນ, ຄະນະບໍລິຫານງານ ສຄອ ແຫ່ງຊາດ ແລະ ປະທານກຸ່ມຜູ້ຜະລິດສີມັງລາວ.
ພາກເຕັກນິກຂອງໂຄງການ ຈະຊ່ວຍປ່ຽນຈາກການນຳໃຊ້ພະລັງງານ ເຊື້ອເພີງ ແລະ ພະ ລັງງານໄຟຟ້າ ມາເປັນການນຳໃຊ້ພະລັງງານທົດແທນທີ່ເຮັດມາຈາກສິ່ງເສດເຫລືອ ເຊັ່ນ: ເສດໄມ້, ຂີ້ເລື່ອຍ, ແລະ ຂີ້ເຫຍື້ອຕ່າງໆ ເຂົ້າ ໃນການຜະລິດສີມັງ.
ບໍລິສັດ Climate Control Strategies GmbH ຈະສະຫນອງອຸປະກອນເຕັກໂນໂລຊີ ທີ່ຄົບວົງຈອນ ແລະ ທັນສະໄຫມຈາກປະເທດເຢຍລະມັນ ແລະ ເດັນມາກ ເພື່ອໃຫ້ຫນັ້ນ ໃຈວ່າ ຂັ້ນຕອນການຜະລິດຊີມັງແມ່ນໄດ້ຮັບການປັບປຸງ ແລະ ເປັນມິດຕໍ່ສະພາບແວດ ລ້ອມ. ມູນຄ່າການລົງທຶນທັງຫມົດ ແມ່ນ 10 ລ້ານ ໂດລາ ແລະ ໃນເດືອນ ກໍລະກົດ ປີ 2011, ອຸປະກອນສຳລັບໂຄງການ ຈະຖືກສັ່ງຊື້.
ການຫັນປ່ຽນຈາກພະລັງງານຖ່ານຫີນ ແລະ ການປະຢັດພະລັງງານໄຟຟ້າ ຈະສາມາດຫລີກ ລ້ຽງການປອ່ຍ ຄາບອນໄດອອັກໄຊ ຫລື CO2 ອອກສູ່ບັນຍາກາດ ແລະ ຈະຊ່ວຍລຸດຜ່ອນ ບັນຫາໂລກຮ້ອນ ແລະ ຮັກສາ ອຸນະພູມ ແລະ ສະພາບແວດລ້ອມໄດ້ດີ. ໂຄງການດັ່ງກ່າວ ຄາດວ່າ ຈະສາມາດລຸດຜ່ອນ CO2 80.000 ຕັນ ຕໍ່ປີ.
“ບໍລິສັດສີມັງລາວເປັນຫນຶ່ງໃນ ອຸດສາຫະກຳປຸງແຕງຫນັກ ທີ່ນຳໃຊ້ພະລັງງານເຊື້ອເພີງ ແລະ ວັດຖຸດິບຢ່າງຫລວງຫລາຍ ໃນຂະບວນການຜະລິດສີມັງ ແລະ ໄດ້ສ້າງມົນລະພາວະເປັນຜິດ ໃຫ້ແກ່ສະພາບແສດລ້ອມພໍສົມຄວນ. ດັ່ງນັ້ນ, ດ້ວຍຄວາມຮັບຜິດຊອບຕໍ່ສັງຄົມ, ພວກເຮົາ ກໍ່ຢາກເປັນສ່ວນຫນຶ່ງໃນການລຸດຜ່ອນຈຸດນີ້,” ທ່ານ ວັນທອງ ກ່າວຕື່ມ.
ນອກຈາກນັ້ນ, ໂຄງການຍັງ ເປັນໂອກາດອັນດີໃຫ້ແກ່ລະບົບຈັດແຈງສິງເສດເຫລືອ ຫລື ຂີ້ເຫຍື້ຶອ ແບບຍືນຍົງ ໃນເຂດຕົວເມືອງ ເຊັ່ນ: ນະຄອນຫລວງວຽງຈັນ, ທ່າແຂກ ແລະ ສະຫວັນນະເຂດ ໂດຍການນຳໃຊ້ ສິ່ງເສດເຫລືອໃຫ້ເປັນພະລັງງານທົດແທນ ແລະ ຊ່ວຍ ແກ້ໄຂບັນຫາການກຳຈັດຂີ້ເຫຍື້ອ ແລະ ມົນລະພາວະເປັນຜິດທາງນຳ້ ແລະ ອາກາດ ທີ່ເກີດມາຈາກ ການເຜົາຂີ້ເຫຍື້ອ.
ໂຄງການດັ່ງກ່າວສ່ວນຫນຶ່ງແມ່ນ ຈະໄດ້ທຶນຈາກການ ລຸດຜ່ອນ CO2 ອອກສູ່ບັນຍາການ ພາຍໃຕ້ ສັນຍາກຽວໂຕໃນການຈັດຕັ້ງປະຕິບັດກິດຈະກຳໂຄງການກົນໄກການພັດທະນາທີ່ ສະອາດ “ຖ້າໂຄງການໄດ້ຮັບຜົນສຳເລັດແທ້ ໃນການລຸດຜ່ອນ CO2 ແລະ ມີການກວດ ກາຄັກແນ່, ພວກເຮົາຈະໄດ້ໃບຍັ້ງຢືນ ແລະ ຈະໄດ້ຮັບເງິນ ຫລື ຄ່າທົດແທນ ຈາກການ ລຸດຜ່ອນ CO2 ອອກສູ່ບັນຍາກາດ ປະມານ 40 USD/1 ຕັນ,” ທ່ານ ວັນທອງ ອະທິບາຍຕຶ່ມ.
ໃນການຈັດຕັ້ງປະຕິບັດໂຄງການດັ່ງກ່າວ, ຂັ້ນຕອນການຜະລິດສີມັງຈະໄດ້ຮັບການປັບປຸງ ແລະ ສ້າງຄວາມເຂັ້ມແຂງໃຫ້ອຸດສາຫະກຳສີມັງຂອງລາວໄປສູ່ຕະຫລາດສາກົນ.
ບໍລິສັດ Climate Control Strategies GmbH ກໍ່ຈະສືບຕໍ່ລົງທືນ ໃນໂຄງການການປົກ ປັກຮັກສາສະພາບແວດລ້ອມ ໃນ ສປປ ລາວ.
ຜູ້ເຂົ້າຮ່ວມໃນງານ ເຊັນຫນັງສືສະເຫນີການຈັດຕັ້ງປະຕິບັດກິດຈະກຳ ໂຄງການກົນໄກການ ພັດທະນາທີ່ ສະອາດ ປະກອບມີ ຕາງຫນ້າຈາກກະຊວງການຄ້າ ແລະ ອຸດສາຫະກຳ, ກະຊວງພະລັງງານ ແລະ ບໍ່ແຮ່, ອົງການນຳ້ ແລະ ສິ່ງແວດລ້ອມ, ບັນດາສະມາຊິກຂອງ ກຸ່ມຜະລິດສີມັງ ແລະ ນັກວິຊາການ ຈາກສະພາກການຄ້າ ແລະ ອຸດສາຫະກຳແຫ່ງຊາດ ລາວ.
|
